د افغانستان ا.ا د عامې روغتیا وزیر، ښاغلي مولوي نور جلال جلالي او مل پلاوي د بلخ ولایت له سیمه ییز روغتون څخه لیدنه ترسره کړه
په دې لیدنه کې چې د بلخ عامې روغتیا رئیس، الحاج رحمت الله منصور یې هم ملتیا کوله، د عامې روغتیا وزیر د ناروغانو احوال واخیست، له روغتیايي کارکوونکو سره یې خبرې وکړې او هغوی ته یې د معیاري خدمتونو وړاندې کولو په موخه سپارښتنې وکړې.
ښاغلي وزیر همداراز، د ناروغانو د ستونزو اورېدو تر څنګ د روغتیايي خدمتونو پر ښه والي ټینګار وکړ او ویې ویل: د ناروغانو درملنه د روغتیايي سکتور اساسي مسؤلیت دی، روغتیايي کارکوونکي باید له مراجعینو سره د مسلکي اصولو او انساني ارزښتونو له مخې چلند وکړي او هڅه وکړي، چې خلکو ته پر وخت او اغېزمن خدمات وړاندې کړي.
