د افغانستان ا.ا د عامې روغتیا وزیر، ښاغلي مولوي نور جلال جلالي میدان وردګ ولایت ته د سفر په ترڅ کې د ۶۳ میلیونه افغانیو په ارزښت د دایمیرداد ولسوالۍ عمومي روغتون د جوړېدو ډبره کېښوده
په همدې موخه جوړو شویو مراسمو کې د عامې روغتیا وزیر ښاغلي مولوي نور جلال جلالي او مل پلاوي، د عامې روغتیا رئیس حافظ سعید الرحمن قادري، د دایمیرداد ولسوال، د یو شمېر نورو ولايتي ادارو مسؤلینو او د سیمې اوسېدونکو ګډون کړی و.
د عامې روغتیا وزیر دغه روغتیايي پروژه د ولسوالۍ اوسېدونکو لپاره روغتیايي خدمتونو د لاسرسي اسانتیا، د اساسي روغتیايي اړتیاوو پوره کولو او معیاري درملنې برخه کې یو مهم ګام وباله او ویې ویل: د داسې روغتونونو جوړېدل به په لرو پرتو ولسوالیو کې د روغتیايي خدمتونو د کیفیت لوړولو ترڅنګ خلکو ته د معیاري او پر وخت درملنې زمینه برابره کړي.
ښاغلي وزیر زیاته کړه، عامې روغتیا وزارت ژمن دی چې د هېواد په ټولو سیمو کې خلکو ته باکیفیته، عادلانه او معیاري روغتیايي خدمتونه وړاندې او د روغتیايي خدمتونو د کیفیت او معیارونو لا ښه والي په موخه به خپلو هڅو ته دوام ورکړي.
