د افغانستان اسلامي امارت د عامې روغتیا وزیر، ښاغلي مولوي نورجلال جلالي هند هېواد ته د خپل رسمي سفر په جریان کې د دې هېواد د روغتیا او کورنۍ هوساینې له وزیر جګت پراکاش ندا سره لیدنه تر سره کړه
په دې لیدنه کې د روغتیايي اړیکو پر پیاوړتیا، د روغتیایي کارکوونکو تر منځ د تجربو تبادلې، د افغان روغتیایي کارکوونکو ظرفیت لوړونې ته د زمینې برابرولو، د معیاري درملو افغانستان ته را واردولو، د سرطان د درملنې برخه کې د درملو او ظرفیت لوړونې، افغان ناروغانو ته هند کې د درملنې او ویزې برابرولو پر اسانتیا، د افغانستان روغتیایي مراکزو ته د طبي تجهیزاتو برابرولو او ځینې نورو مواردو اړوند خبرې تر سره شوې.
د عامې روغتیا وزیر ښاغلي مولوي نور جلال جلالي د روغتیا په برخه کې د هند هېواد له وروستیو همکاریو مننه وکړه او د روغتیایي سیستم د لا ښه والي په موخه یې ځینې موضوعات له ښاغلي ندا سره شریک کړل.
بل لور ته د هند هېواد د روغتیا وزیر د خپلو خبرو په جریان کې وویل، مونږ تعهد لرو، چې د افغانستان له ولسونو سره د درملو، واکسین او نورو اړینو برخو کې همکارۍ ته ادامه ورکړو، او په وینا یې په نږدې کې به د کابل صحت طفل روغتون لپاره یو سي ټي سکین ماشین، ځینې درمل او واکسین ولیږي، نوموړي وویل: د افغان ناروغانو د درملنې لپاره به هڅه وکړي چې لا اسانتیاوې رامنځته کړي او په وینا یې هر ډول همکارۍ ته اماده دي.
