د افغانستان اسلامي امارت د عامې روغتیا وزیر، ښاغلي مولوي نورجلال جلالي په خپل کاري دفتر کې له جینوا څخه د روغتیا نړیوال سازمان راغلي پلاوي سره مجلس ترسره کړ
د عامې روغتیا وزیر، ښاغلي مولوي نور جلال جلالي د یاد سازمان له استازو سره د خپلو خبرو په ترڅ کې د تېرو مجالسو په تعقیب چې د روغتیا نړیوال سازمان له مسؤولینو سره شوي وو په مرکز کابل کې د پولیو د تشخیص لابراتوار د ټولو برخو ښه مجهز کېدنې، د کارکوونکو د لا ظرفیت لوړونې او د لا ښه منظم فعالیت اړوند خبرې تر سره کړې.
ښاغلي وزیر د پولیو او نورو ساري ناروغیو سره مبارزه د عامې روغتیا وزارت له لمړیتوبونو څخه وګڼله او په وینا یې چې هڅه یې د وقایوي تدابیرو په عملي کولو سره د پولیو ناروغۍ له منځه وړل دي چې په دې برخه کې د پولیو لابراتوار ښه مجهز کیدل د دې ناروغۍ د ژر او ښه تشخیص لپاره خورا اړین دی.
له جینوا څخه راغلي پلاوي چې د ختیځې مدیترانې حوزې مسؤولینو هم شتون درلود د پولیو لابراتوار اړوند خپل نظریات شریک کړل او په وینا یې چې په دې برخه کې به خپل لازم اقدامات وکړي.
