د بلخ ولایت دولت اباد ولسوالۍ ۵۰ بستریز روغتون کې د ۲۰ زره امریکایي ډالرو په لګښت د خوار ځواکو ناروغانو لپاره لس بستريزه څانګه پرانیستل شوه
یاده څانګه چې پنځه خونې لري، د بلخ د عامې روغتیا ریاست په هڅو او د روغتیا نړیوال سازمان په مالي همکارۍ جوړه او ګټې اخیستنې ته وسپارل شوه، چې موخه یې د خوار ځواکو ناروغانو پر وخت، غوره او معیاري درملنه ده.
د دغې څانګې پرانیستې مراسمو کې د بلخ ولایت د عامې روغتیا ریاست یو شمېر نورو مسؤلینو، یاد ولایت لپاره د روغتیا نړیوال سازمان مسؤل، روغتیاپالانو او قومي مخورو ګډون درلود.
د بلخ د عامې روغتیا مرستیال ډاکټر سید احمد شاداب د روغتیا نړیوال سازمان له همکارۍ څخه مننه وکړه او له روغتیایي کارکوونکو څخه یې وغوښتل، چې په اخلاص او صداقت خپلو خدمتونو ته دوام ورکړي.
هغه زیاته کړه، د عامې روغتیا وزارت هڅه کوي، چې د هېواد په لرې پرتو سیمو کې خلکو ته لازم روغتیایي خدمات وړاندې او اړینې اسانتیاوې رامنځته کړي.
