د بلخ ولایت عامې روغتیا ریاست له لوري د کانګو (وينهبهوونکې) ناروغۍ د مخنیوي په موخه یو ورځنی روزنیز کمپاین ترسره شو
دغه کمپاین چې د مرکز مزار شریف ښار په بېلا بېلو برخو کې ترسره شو، موخه یې د عامه پوهاوي لوړول، د کانګو ناروغۍ د خطرونو په اړه بیان او د وقایوي تدابیرو پام کې نیول وو، چې په کې د عامې روغتیا ریاست مرستیال ډاکټر سيد احمد شاداب، د ساري ناروغیو د کنټرول مسؤل، د روغتیا ظرفیت لوړولو مسؤل، روغتیايي کارکوونکو او د همکارو مؤسسو او رسنیو استازو ګډون کړی و
د بلخ عامې روغتیا ریاست مرستیال، ډاکټر سيد احمد شاداب وویل: کانګو یوه جدي او وژونکې ناروغي ده، چې له څارویو څخه انسان ته انتقالېږي او د مخنيوي يوازينۍ لاره یې د عامه پوهاوي لوړول، پاکوالي ته پاملرنه او د وقایوي تدابیرو عملي کول دي.
دغه راز، د ساري ناروغيو د کنټرول مسؤل، ډاکټر منصور ساويز د یادې ناروغۍ د نښو نښانو، د انتقال لارو او د وقایوي تدابیرو په اړه تفصيلي معلومات وړاندې او زياته یې کړه، چې د څارویو د ذبحه کولو او د غوښې پروسس پر مهال باید احتیاطي او لازم تدابير په پام کې ونیول شي.
په دغه کمپاین کې د عامې روغتيا رياست له لوري د یادې ناروغۍ په اړه د عامه پوهاوي بروشورونه ووېشل شول، د رسنيو له لارې عامو خلکو ته اړین پیغامونه وړاندې شول او روغتيايي کارکوونکو ته لارښوونې وشوې، چې د مشکوکو پېښو راپور پر وخت شریک او دې برخې ته لا زیاته پاملرنه وکړي.
د کمپاین ګډونوالو د دغه ډول روزنیزو پروګرامونو پر دوام ټینګار وکړ او له عامو خلکو یې وغوښتل، چې د کانګو ناروغۍ د مخنيوي لپاره له روغتيايي سپارښتنو سره سم عمل وکړي.
