د جنوبي زون ۵۰ روغتیايي کارکوونکو ته د غیر ساري ناروغیو کنټرول او مخنیوي برخو کې څلور ورځنی روزنیز ټریننګ ورکړل شو
یاد ټریننګ د عامې روغتیا وزارت ناروغیو کنټرول او مخنیوي لوی ریاست اړوند، د غیر ساري ناروغیو کنټرول او مخنیوي ډیپارټمنټ له لوري د کندهار، زابل، ارزګان او هلمند ولایتونو ۵۰ روغتیايي کارکوونکو ته د ظرفیت لوړونې په موخه ترسره شو، چې ګډونوالو په کې د غیر ساري ناروغیو کنټرول او درملنې، په دې ناروغیو د اخته کسانو مدیریت او غیر ساري ناروغیو د مخنیوی برخو کې زده کړې ترلاسه کړې.
د روغتیا وزارت د غیر ساري ناروغیو کنټرول او مخنیوي ډیپارټمنټ مسؤل، ډاکټر محمد سمیع کریمي د ناروغیو کنټرول او مخنیوي په موخه ورته روزنیز ټریننګونه مهم وبلل او له ګډونوالو یې وغوښتل، چې د یاد ټریننګ په ترڅ کې زده کړي موضوعات په روغتونونو او روغتیايي مرکزونو کې له خپلو همکارانو سره شریک کړي.
