د جوزجان ۲۰۰ بستریز روغتون ته د ۵۰ زره ډالرو په ارزښت نوي طبي تجهیزات ورکړل شول
د دې تجهیزاتو د سپارلو مراسم د جوزجان د عامې روغتیا رئیس قاري ذبیح الله حسیني، د اطلاعاتو او کلتور رئیس مولوي سیف الدین معتصم او د دغه ولایت د سیمه ییزو ادارو د یو شمېر مسؤلینو په شتون کې ترسره شول.
د جوزجان د عامې روغتیا رئیس، قاري ذبیح الله حسیني وویل: دا مرسته چې پنځه قلمه مهم طبي تجهیزات په کې شامل دي، د شیخ سرور بن محمد آل نهیان، چې د متحده عربي اماراتو له شیوخو څخه دی، ترسره شوې، چې ورسره به د جوزجان په ۲۰۰ بستریز روغتون کې روغتیايي خدمتونه لا ښه شي.
په دې روغتیايي تجهیزاتو کې یوه پایه د ناروغانو مانیټور، زېږون مېز، د الټراساونډ ماشین (سونولوژي)، د تعقیم کولو ماشین (آټوکلاو) او یو ساده پرینټر ماشین شامل دي.
د یادونې وړ ده، چې د دې تجهیزاتو په مرسته یاد روغتون کې د طبي تجهیزاتو د نشتوالي له امله رامینځته شوې شاوخوا ۵۰ سلنه ننګونې حل شوې دي.
