د خصوصي سکتور روغتیایي کارکوونکو ته یو ورځنی سیمینار وړاندې شو
د عامې روغتیا وزارت د خصوصي سکتور د تنظیم او همغږۍ ریاست له لوري د روغتیايي مرکزونو کارکوونکو ته د واحد یونیفورم قانون د تشریح او په روغتونونو کې د ښځلو او بې کاره طبي توکو د مدیریت په اړه یو ورځنی رونیز سمینار ترسره شو
یاد روزنیز سمینار چې د امیري روغتون په تالار کې جوړ شوی و، په کې د عامې روغتیا وزارت د خصوصي سکتور د تنظیم او همغږۍ رئیس، د مرکز کابل خصوصي روغتونونو مسؤلینو او د طبي پاتې شونو (ښځلو) راټولولو شرکتونو استازو ګډون کړی و.
د یاد سمینار په پرانیسته کې د عامې روغتیا وزارت د خصوصي سکتور د تنظیم او همغږۍ رئیس، ډاکتر احمد خندان وویل: “ د اسلامي امارت او عامې روغتیا وزارت د رهبرۍ پالیسي په افغانستان کې د دولتي روغتیايي سکتور سربېره د خصوصي روغتیايي سکتور پیاوړتیا او د باکیفیته او معیاري روغتیايي خدمتونو وړاندې کول دي”.
په دې سمینار کې همداراز د امیري کمپلکس مرستیال، انجینر سیلاب د ګډونوالو په استازیتوب د خصوصي سکتور د تنظیم او همغږۍ ریاست څخه د مننې ترڅنګ وویل، د عامې روغتیا وزارت په تېرو دریو کلونو کې بې سارې لاسته راوړنې لرلې، چې د ستایلو وړ دي.
نوموړی دغه راز د روغتیا وزارت له رهبرۍ څخه په روغتیايي سکتور کې د پانګونې او ملاتړ په موخه د لا زیاتې پاملرنې غوښتونکی شو.
