د روغتیايي خدمتونو د ډیجیټل کولو په موخه د همغږۍ غونډه ترسره شوه
دا غونډه د عامې روغتیا وزارت د معالجوي طب لوی رئیس، ډاکتر وحدت الکوزي تر مشرۍ لاندې د مالیې او مخابراتو وزارتونو د استازو په شتون کې تر سره شوه.
په دې غونډه کې په روغتونونو کې د روغتیايي خدمتونو ډیجیټل کولو، د عوایدو راټولولو او د عامې روغتیا وزارت د اړوندو نورو برخو په اړه بحث او خبرې تر سره شوې.
ډاکتر وحدت الکوزي وویل: (د روغتیايي خدمتونو د لا ښه مدیریت، اسانه لاسرسي او د ناروغانو د معلوماتو د کره ثبت لپاره د روغتونونو ډیجیټل کول یو بنسټیزه اړتیا ده، نوموړي زیاته کړه: د یو شفاف سیستم له لارې د معالجوي خدمتونو کیفیت تضمین کېدای شي، چې دا کار به د ناروغانو د رضایت زیاتوالي سبب هم وګرځي).
په دې غونډه کې د عامې روغتیا وزارت مسؤلینو خپلې تخنیکي او اجرائيوي اړتیاوې د یو پرېزنټېشن له لارې شریکې کړې، چې د مالیې او مخابراتو وزارتونو مسؤلینو په دې برخه کې د همکارۍ ډاډ ورکړ.
