د روغتیايي خدمتونو وړاندې کولو مرستیال د اداري اصلاحاتو او ملکي خدمتونو له رئیس سره وکتل
د عامې روغتیا وزارت د روغتیايي خدمتونو وړاندې کولو مرستیال، ښاغلي مولوي عبدالولي حقاني د یوې ناستې په ترڅ کې د چارو ادارې عمومي ریاست د اداري اصلاحاتو او ملکي خدمتونو له رئیس، ښاغلي مفتي شهزاده نور راشد سره لیدنه ترسره کړه
د دې ناستې موخه د عامې روغتیا وزارت کارکوونکو ته د کاري بهیرونو او پروسو ساده کولو په اړه د معلوماتو وړاندې کول وو، چې په اړه یې بحث او خبرې ترسره شوې.
د عامې روغتیا وزارت د روغتیايي خدمتونو وړاندې کولو مرستیال، ښاغلي مولوي عبدالولي حقاني د اداري اصلاحاتو په برخه کې د کاري بهیر ساده کول د وخت ضایع کېدو، خلکو ته د اسانتیاوو په رامنځته کولو، او پر وخت د کارونو ترسره کولو کې یو اغېزمن ګام وباله او د یادې ادارې له مسؤلینو یې د ورته برنامو د پلي په موخه مننه وکړه.
له بل لوري د چارو ادارې عمومي ریاست د اداري اصلاحاتو او ملکي خدمتونو رئیس، ښاغلي مفتي شهزاده نور راشد په اداري چارو کې د کارونو اسانتیا په موخه د پروسو ساده کول مهم او اړین وګڼل او ویې ویل، د یادې پروسې په پلي کولو سره به وکولای شو د خلکو رضایت سربېره د هغوی کارونه پر وخت اجرا او د دولت او خلکو تر منځ ښې اړیکې جوړې کړو.
له بل لوري د اداري اصلاحاتو او ملکي خدمتونو کارکوونکو د اداري چارو د پروسو ساده کولو په موخه د یو پرزینټېشن په ترڅ کې د عامې روغتیا وزارت کارکوونکو ته معلومات وړاندې کړل او له هغوی يې وغوښتل، چې یاده پروسه د عامې روغتیا وزارت په اداراتو کې پلي کړي.
