د عامې روغتيا وزارت د خوړو او درملو مرستیال، ښاغلي مولوي حمدالله زاهد او د ياد معينيت تخنيکي ټيم له چينايي پانګهوال ډاکټر هان شویونګ او مل پلاوي سره ليدنه ترسره او خبرې وکړې
په دې ليدنه کې دواړو لورو د درملو او درمليزو خامو موادو برخه کې د اقتصادي او تخنيکي همکاریو پراختيا، په افغانستان کې د پانګونې شته فرصتونو، د تجربو لېږد، د نويو ټکنالوژيو کارونې او د ګډو همکاریو د پراختيا په اړه بحث ترسره او نظرونه شريک کړل.
د خوړو او درملو مرستیال چينايي پلاوي ته ښه راغلاست ووايه او په افغانستان کې يې د پانګونې لپاره د هغوی د لېوالتيا هرکلی يې وکړ. نوموړي ټينګار وکړ، چې د خوړو او درملو معينيت به د نافذه قوانينو او مقرراتو په چوکاټ کې د درملو، خوړو او روغتيايي محصولاتو برخه کې له مشروع او معياري پانګونو ملاتړ وکړي او په دې برخه کې به اړينې اسانتياوې هم برابرې کړي.
د غونډې په پای کې چينايي پانګهوالو افغانستان په شته فرصتونو خوښۍ څرګنده او د درملو، درمليزو خامو موادو او روغتيايي خدمتونو نورو اړوندو برخو کې يې د همکاریو پراختيا او د ګډې پانګونې د فرصتونو ارزونې لپاره خپل چمتووالی وښود.
