د عامې روغتيا وزارت له لوري په راډيولوژي انسټېټیوټ کې د الټراساونډ زده کړو دوهم ټولګي پرانيستې مراسم ترسره شول
په يادو مراسمو کې د عامې روغتيا وزارت د معالجوي طب لوی رئیس ډاکټر وحدت الکوزي، د تشخيصيه خدماتو رئيس ډاکټر محمد قاسم صاحبي، د اکمال تخصص د اکاډميکو چارو د انسجام رئيس ډاکټر احمد فرشيد محمدي، د راډیولوژي انسټېټیوټ امر ډاکټر اول خان شفق، یو شمېر نورو مسؤلینو، روغتيايي کارکوونکو او د الټراساونډ زده کړيالانو ګډون کړی و.
د معالجوي طب لوی رئیس ډاکټر وحدت الکوزي الټراساونډ معاينات د ناروغیو په تشخيص کې مهم وبلل او زده کړيالانو ته يې لارښوونه وکړه، چې خپلو زده کړو ته لازمه پاملرنه او له غير حاضرۍ څخه ډډه وکړي.
دغه راز، ډاکټر وحدت الکوزي وويل: عامې روغتيا وزارت د روغتيايي خدمتونو کيفيت لوړولو او ورته د خلکو لاسرسي پراخوالي لپاره هڅې ګړندۍ کړي؛ څو د هېوادوالو روغتيايي ستونزې حل او خدماتو ته اسانه لاسرسی ولري.
ورته مهال، د اکمال تخصص د اکاډميکو چارو د انسجام او تشخیصیه خدماتو رئیسانو د زده کړو پر کیفیت او د ازموينو بهير پر شفافيت ټينګار وکړ او هم يې د ورته برنامو د دوام يادونه وکړه.
