د عامې روغتيا وزير، ښاغلي مولوي نور جلال جلالي د يو شمېر لوړپوړو مسؤلینو او روغتیايي ټيمونو سره په ګډه د کونړ ولایت له زلزله ځپلو سيمو څخه لیدنه ترسره کړه
په دې لیدنه کې د عامې روغتيا وزير، د زلزله ځپلو کورنيو سره له نږدې وکتل، د هغوی ستونزې يې واورېدې او ډاډ يې ورکړ، چې روغتیا وزارت او د پېښې اړوند ادارې به د ټولو امکاناتو څخه په ګټه اخیستنې سره د خلکو د درملنې، عاجلو روغتيايي خدمتونو او ضروري اسانتیاوو برابرولو برخه کې خپلو هڅو ته دوام ورکړي.
د دې سفر په ترڅ کې د بېړنيو مرستندويه ټيمونو د فعاليت څرنګوالی هم وارزول شو او اړوند مسئولينو ته لازمې سپارښتنې وشوې، تر څو د روغتيايي خدمتونو وړاندې کولو بهیر لا چټک او اغېزمن کړي.
د عامې روغتيا وزارت ډاډ ورکوي، چې له نورو اړوندو دولتي ادارو او مرسته کوونکو سازمانونو سره په ګډه به د زلزله ځپلو خلکو د ژوند ژغورنې او ستونزو د حل لپاره بېړنۍ او دوامدارې هڅې جاري ساتي.
