د عامې روغتیا سرپرست وزیر په قطر کې د نړیوالو موسسو له استازو سره وکتل
پنجشنبه، د وری ۱۱مه ۱۴۰۱
د عامې روغتیا وزارت سرپرست ډاکټر قلندر عباد او ورسره مل پلاوي د قطر په پلازمېنه دوحه کې د یوې ناستې په ترڅ کې د روغتیا نړیوال سازمان، یونیسف او د امریکا د نړیوالې پراختیا ادارې (USAID) له استازو سره وکتل.
په دې کتنه کې د روغتیایی سیستم د لومړیتوبونو پر پیاوړتیا، د راتلونکو دوو کلونو لپاره د روغتیایی تمویل پروګرام او نورو روغتیایی مسایلو په اړه بحث وشو.
په دې کتنه کې د ډاکټرانو د ظرفیتونو د لوړولو په اړه هم خبرې وشوې او د قطر دولت ژمنه وکړه چې د ډاکټرانو د روزنې او ظرفیت لوړولو په برخه کې به همکاري کوي.
له بلې خوا د عامې روغتیا وزارت مشرتابه په قطر کې له یو شمېر متخصصو روغتونونو څخه د لیدنې په ترڅ کې خپل سفر ته دوام ورکړ.
