د عامې روغتیا وزارت د رهبرۍ په شتون کې د چارو د لا ښه والي په موخه د همغږۍ ناسته ترسره شوه
د عامې روغتیا وزارت د رهبرۍ په شتون کې د څارنې، پلټنې او روغتیايي معلوماتو سیستم لوی ریاست ، د خصوصي سکتور د همغږۍ ریاست ،د روغتیايي کارکوونکو د جوازدهۍ ریاست او د روغتیايي تاسیسیاتو څخه د بازرسۍ ریاست تر منځ د چارو د لا ښه والي په موخه د همغږۍ ناسته ترسره شوه
په دې ناسته کې چې د عامې روغتیا وزیر ښاغلي مولوي نور جلال جلالي، د مالي او اداري چارو مرستیال ښاغلي ملا بخت الرحمن شرافت، د روغتیايي خدمتونو وړاندې کولو مرستیال ښاغلي مولوي عبدالولي حقاني او د اړوندو ریاستونو مسؤلینو ګډون کړی و، چارو ته پر ټاکلي وخت د رسېدنې، د خصوصي سکتور مسؤلینو له لوري د شریکو شویو شکایتونو په اړه د پرېکړو، د ښې همغږۍ په موخه د خصوصي روغتیايي مرکزونو لپاره د یو واحد ډیټابیس سیسټم جوړولو، ګډ نظارتي پلان جوړېدو او پلي کېدو اړوند خبرې ترسره شوې.
د عامې روغتیا وزیر، ښاغلي مولوي نور جلال جلالي د چارو لا ښه والي لپاره د اړوندو ریاستونو له لوري د یوې ګډې نظارتي کمېټې په جوړېدو ، د روغتیايي خدماتو لپاره د لګښتونو د اندازې تعینولو ، له خصوصي سکتور د ارقامو په منظم راټولولو او له روغتیايي مرکزونو څخه د نظارت په لا غښتلي کولو ټینګار وکړ او اړونده مسؤولینو ته یې په دې برخه کې د اقدام کولو سپارښتنې وکړې.
