د عامې روغتیا وزارت د روغتیايي پراختیا او پالیسۍ مرستیال، ښاغلي ډاکتر محمد حسن غیاثي، د پلان او پالیسۍ له لوی رئیس او مل پلاوي هرات ته د دغه ولایت د روغتیايي خدمتونو د وضعیت ارزونې په موخه سفر ترسره کړ

همدارنګه، ا.ا.ا د ریاست‌الوزراء عالي مقام د هدایت پر بنسټ، د ټولګټو وزارت په مشرۍ د ګډ کمیسیون د پرېکړې له مخې، د رېل پټلۍ په سټېشنونو کې د هېوادوالو ته د روغتیايي خدمتونو د برابرولو په موخه، د عاجل روغتیايي مرکزونو د جوړولو مسؤلیت د عامې روغتیا وزارت ته وسپارل شو.

د پرېکړې له مخې، د هرات ولایت روزنک سیمې د رېل پټلۍ په سټېشن کې یو باب عاجل روغتیايي مرکز جوړ شو، چې پکې عاجل او OPD خدمات، نسایي ولادي خدمتونه، قرنطین، تغذیه، سکریننګ، واکسیناسیون او د امبولانس خدمتونه وړاندې کېږي.

دغه راز، یاد پلاوي د هرات د سترګو حوزوي روغتون، تلاسیمیا روغتون، د خصوصي سکتور روغتیايي بنسټونه، د درملو او خوړو د تولید فابریکې، د طبي وسایلو د تولید مرکزونه او د خوړو او درملو د کنټرول لابراتوارونه هم له نږدې وکتل او مسؤلینو ته یې د چارو د لا ښه‌والي په موخه لازمې سپارښتنې وکړې.