د عامې روغتیا وزارت د روغتیايي کارکوونکو لپاره د مدیریت او عامې روغتیا اخلاقي اصولو روزنیز ورکشاپ ترسره کړ
د عامې روغتیا وزارت د عامې روغتیا زدهکړو ریاست او د افغانستان عامې روغتیا ملي انسټیټیوټ له لوري د استقلال او رواني روغتیا روغتونونو ۳۲ تنو روغتیايي کارکوونکو ته د مدیریت او عامې روغتیا اخلاقي اصولو زده کړې اوونیز ورکشاپ ترسره شو
دغه روزنیز ورکشاپ د روغتیايي کارکوونکو د پوهې لوړولو او د مدیریت او عامې روغتیا اخلاقي اصولو برخه کې د هغوی د مسلکي وړتیاوو پیاوړتیا په موخه جوړ شوی و، چې په کې د مدیریت بنسټونه، اداري مدیریت، راپور لیکنه، د کاري ټیم جوړول، اغېزمنه اړیکه (مفاهمه)، د کثافاتو مدیریت، د عامې روغتیا بنسټیز اصول، د عامې روغتیا اخلاقيات، د روغتیا ترویج او له ناروغانو سره د روغتیايي کارکوونکو مناسب چلند د مجربو او مسلکي استادانو له لوري تدریس شول.
د پروګرام په پای کې ګډونوالو ته تصدیق پاڼې ورکړل شوې او ترې وغوښتل شول، چې خپلې زده کړې په کاري چاپېریال کې عملي کړي؛ ترڅو د روغتیايي خدمتونو د کیفیت لوړولو، د مسلکي اخلاقو مراعاتولو او مراجعینو ته د غوره خدمتونو وړاندې کولو برخه کې اغېزمن او رغنده رول ولوبوي.
