د عامې روغتیا وزارت د مالي او اداري چارو مرستیال له خوا د هلمند روغتونونو څخه څارنیز لیدنه
د ا.ا.ا د عامې روغتیا وزارت د مالي او اداري چارو مرستیال، ښاغلي ملا بخت الرحمن شرافت د مل تخنیکي ټیم سره په ګډه هلمند ته د سفر پر مهال د بُست ولایتي، ملکه ثریا او فاطمه بیات روغتونونو څخه لیدنه تر سره کړه
په دې لیدنه کې چې د هلمند د عامې روغتیا رئیس، مولوي فضلي احمد شفیع الله یې هم ملتیا کوله، د مالي او اداري چارو مرستیال، ښاغلي ملا بخت الرحمن شرافت د یادو روغتونونو بېلا بېلې څانګې ولیدې، ستونزې یې په نښه او د حل په موخه یې د لازمو اقداماتو ژمنه وکړه.
ښاغلي مرستیال همداراز، د یادو روغتونونو د بستر ناروغانو احوال واخیست، د هغوی د روغتیا هیله یې څرګنده او د درملنې ډاډ یې ورکړ.
هغه دغه راز، د روغتیايي کارکوونکو هڅې وستایلې او د لا ښه خدمت په موخه یې ورته اړینې سپارښتنې وکړې.
