د عامې روغتیا وزارت د پراختیايي پروژو د همغږۍ غونډه ترسره شوه
دغه غونډه د عامې روغتیا وزارت د مالي او اداري چارو مرستیال، ښاغلي قاري عبدالولي صدیقي په مشرۍ، د مرکزي رئیسانو او پراختیايي پروژو د مسؤلینو په ګډون ترسره شوه.
په دې غونډه کې د مالي او اداري چارو مرستیال د پراختیايي پروژو د بودجې پر منظم، شفاف او اغېزمن لګښت ټینګار وکړ او ویې ویل، چې ځانګړې شوې بودجه باید د ټاکل شوي پلان او اړتیاوو له مخې، په سمه او مسؤلانه توګه ولګول شي. نوموړي همداراز، د مسؤلیتونو د ترسره کولو پر مهال د ژمنتیا او لازمې پاملرنې پر مراعاتولو ټینګار وکړ او مسؤلینو ته یې لارښوونه وکړه، چې خپلې دندې او مسؤلیتونه په ښه او مطلوب ډول ترسره کړي.
همداراز، د عامې روغتیا وزارت د پلان او پالیسۍ لوی رئیس، ډاکتر سید رسول منګل، د ۱۴۰۵ مالي کال په لومړیو شپږو میاشتو کې د پراختیايي پروژو د بودجې د لګښتونو په اړه معلومات وړاندې کړل. نوموړي د ۱۴۰۵ مالي کال د منځنۍ ارزونې پر مهال د پراختیايي پروژو لپاره د اضافي بودجې د غوښتنې په اړه هم معلومات شریک کړل.
بل لور، د پراختیايي پروژو مسؤلینو د بودجې د لګښتونو، د فعالیتونو پرمختګ، په پروژو کې د شته ستونزو او ننګونو په اړه معلومات وړاندې او خپل وړاندیزونه یې د وزارت له رهبرۍ سره شریک کړل.
د غونډې په پای کې د مسؤلینو ترمنځ پر لا زیاتې همغږۍ، د پروژو د تطبیق بهیر پر چټکتیا، د بودجې پر شفاف او اغېزمن لګښت او د شته ستونزو پر حل ټینګار وشو.
