د عامې روغتیا وزارت د پوهاند غضنفر روغتیایي علومو انسټیټیوټ رئیس د ناروې کمېټې له مشر سره ولیدل
د عامې روغتیا وزارت اړوند پوهاند سید الف شاه غضنفر روغتیايي علومو انسټېټیوټ رئیس، محمد قاسم عادل د افغانستان لپاره د ناروې کمېټې له مشر، تاریا واټر ډال مګنوسیوم سره لیدنه ترسره کړه
په دې لیدنه کې په دایکندي ولایت کې د یوې قابلګۍ دورې لپاره د محصلینو د جذب، په کابل ولایت کې د بدن مصنوعي غړو جوړولو (پروستیتیک او اورتوتیک) درې کلن پروګرام په امتحاني توګه فعالولو، په ۲۰۲۶ زیږدیز کال کې سترګو تکنیشن پروګرام فعالولو، په پروان ولایت کې د قابلګۍ پروګرام د نیمګړې دورې بشپړولو او د پوهاند غضنفر انسټېټیوټ اړوند لیلیو او اداري څانګو لپاره د اوبو تصفیه کولو ماشینونو (Water Purifier) د نصبولو اړوند بحث او خبرې ترسره شوې.
د پوهاند غضنفر انسټېټیوټ رئیس یادو برخو کې د دغه کمېټې همکاري اړینه وبلله او په همدې موخه د یادې کمېټې څخه د مرستې غوښتونکی شو.
بل لور د افغانستان لپاره د هېواد په کچه د ناروې کمېټې مسؤل، تاریا واټر ډال مګنوسیوم په دی اړه د همکاریو ډاډ ورکړ او ویي ویل، ژر تر ژره به اړونده موضوعات د ډونرانو/بسپنه ورکونکو سره شریک کړي؛ ترڅو د راتلونکو ۲۰۲۵ او ۲۰۲۶ کلونولپاره بودیجه پیدا او پروګرامونه په ښه بڼه پلي کړي.
