د عامې روغتیا وزارت د څارنې او پلټنې لوی رئیس، ډاکټر عنایت الله عنایت په خپل کاري دفتر کې د ایمرجنسي روغتون له مسؤلینو سره ناسته ترسره کړه
په دې ناسته کې چې د عامې روغتیا وزارت د مقام مشاورینو (ډاکټر حدیدالله ذاکري او ډاکټر علي احد) د HMIS تخنیکي کارکوونکو، پروفیسور ډاکټر ایمل وردګ او پروفیسور ډاکټر نجیب الله سکندري هم ګډون درلود، د روغتیايي خدمتونو کیفیت لوړولو، د ادارو ترمنځ د لا ښې همغږۍ او شته ستونزو حل په موخه بحث او خبرې ترسره شوې.
همدارنګه، د څارنې او پلټنې لوی رئیس، ډاکټر عنایت الله عنایت د یاد روغتون د وضعیت او شته ستونزو په اړه یو جامع پرزنټېشن وړاندې کړ او ګډونوالو هم خپلې مسلکي مشورې او نظرونه شریک کړل.
په پای کې پرېکړه وشوه، چې دا ډول ناستې به د لا اغېزمنې همغږۍ او روغتیایي خدمتونو کیفیت ښه والي په موخه راتلونکي کې هم ترسره شي.
