د عامې روغتیا وزارت د څارنې لوی رئیس د انتاني ناروغیو ملي روغتون د روغتیایي خدماتو بهیر وڅاره
د عامې روغتیا وزارت د څارنې او پلټنې لوی رئیس، ډاکټر عنایت الله عنایت او مل تخنیکي ټیم په کابل ولایت کې د انتاني ناروغیو درملنې ملي او تخصصي روغتون د وړاندې کېدونکو روغتیایي خدماتو له بهير څخه نظارت ترسره کړ
دغه نظارت له دولتي او خصوصي روغتونونو د هر اړخیزې څارنې پروګرام په چوکاټ کې ترسره شو، ترڅو د ښاریانو لپاره د روغتیایي خدمتونو وړاندې کولو ارزونه ترسره او په روغتیایي چارو کې شفافیت تأمین شي.
د دې نظارت په ترڅ کې ډاکټر عنایت الله عنایت د یاد روغتون له ټولو برخو څخه لیدنه وکړه، د ناروغانو احوال یې واخیست، د هغوی د روغتیا او سلامتیا هیله یې څرګنده او د بشپړې پاملرنې ډاډ یې ورکړ.
همدارنګه، ډاکټر عنایت الله عنایت د یاد روغتون له رئیس او سرطبیب سره په لیدنه کې د ټولو روغتیایي او خدماتي کارکوونکو د هڅو او کړنو ستاینه او قدردانی وکړ.
