د عامې روغتیا وزارت له لوري د زړه ناروغیو مخنیوي په موخه د لسګونه ورزشکارانو (لوبغاړو) پرمټ په عمومي لارو کې خلکو ته د دې ناروغۍ څخه د مخنیوي او ورڅخه د ځان ساتنې پیغام وړاندې شو
د ورزشکارانو له لوري د عامه پوهاوي په موخه په عمومي لارو یاد حرکت د زړه ناروغیو د مخنیوي لپاره ترسره شو، چې موخه یې خلکو ته د زړه ناروغیو څخه د ځان ساتنې لارې چارې ښودل وو.
د عامې روغتیا وزارت د ساري ناروغیو د کنټرول او مخنیوي لوی ریاست اړوند د ساري ناروغیو د کنټرول او مخنیوي آمر، ډاکټر محمد سمیع کریمي وویل: ( د دې ناروغۍ د مخنیوي په موخه یې د عامه پوهاوي غونډې ترسره کولو سربېره د لسګونه لوبغاړو په همکارۍ په عمومي لارو کې خلکو ته پیغام ورساو؛ تر څو خلک د زړه ناروغۍ په اړه معلومات ترلاسه او د مخنیوي لارې چارې یې عملي کړي).
د یادونې وړ ده، چې د زړه ناروغیو له امله هر کال په نړیواله کچه ۱۸ میلیونه انسانان خپل ژوند له لاسه ورکوي، چې د دې کچې د راټیټولو لپاره په منظم ډول ورزش او د تازه میوو او سبزیجاتو کارول اړین بلل شوي دي.
