د عامې روغتیا وزارت له لوري ۸۸ تنه متخصصین د اکمال تخصص برنامې د پیاوړتیا په موخه د ټرینرانو په توګه معرفي شول
د ا.ا.ا د عامې روغتیا وزارت له لوري د اکمال تخصص برنامې د لا غښتلتیا په موخه ۸۸ ځوان او با استعداده متخصصین د ټرینرۍ د ټولو مراحلو تر سره کیدو وروسته د مرکز او ولایتونو تخصصي روغتونو ته د ټرینرانو په حیث معرفي شول:
په همدې موخه جوړو شویو مراسمو کې د عامې روغتیا وزارت د مالي او اداري چارو مرستیال ښاغلي قاري عبدالولي صدیقي، د مقام د دفتر لوی رئیس شیخ محمد طاهر حلیم، د اکمال تخصص لوی رئیس ډاکټر نثار احمد نیازي، د ویاندویۍ، اطلاعاتو او عامه اړیکو رئیس او ویاند ډاکټر شرافت زمان، یو شمېر نورو مسؤلینو او متخصصو ټرینرانو ګډون درلود.
د عامې روغتیا وزارت د مالي او اداري چارو مرستیال، ښاغلي قاري عبدالولي صدیقي بریالیو ټرینرانو ته په ازموینه کې د بریا مبارکي ورکړه او ترې ویې غوښتل، خپلو مسؤلیتونو ته پوره پاملرنه وکړئ؛ ترڅو د نورو له احتیاجه خلاص او وګړي مو هوسا شي.
دغه راز، د اکمال تخصص لوی رئیس ډاکټر نثار احمد نیازي وویل، دغه ازموینه په بشپړ شفافیت سره د ازموینو ملي ادارې په همکارۍ واخیستل شوه چې د اکمال تخصص په تاریخ کې یو بې ساری لوړ او د ستاینې وړ اقدام دی چې په دومره لوړه کچه ځوان متخصصین د ټرینر متخصصینو په توګه سیستم کې جذبیږي.
د یادونې وړ ده، څه موده وړاندې د عامې روغتیا وزارت د اکمال تخصص لوی ریاست له لوري د ازموینو ملي ادارې په همکارۍ د هېواد تخصصي روغتونونو کې د ټرینرۍ خالي بستونو ډکولو په موخه له یو شمېر متخصصو ډاکټرانو څخه تحریري او عملي ازموینه اخیستې وه، چې د ازموینې پایلو تر اعلانېدو وروسته ۸۸ تنه متخصص ټرینران بریالي شوي وو او رسما خپلو اړوندو بستونو ته ورمعرفي شول ، د پاتې نورو بستونو لپاره به هم په نږدې کې ازموینه واخیستل شي.
