د عامې روغتیا وزیر بلخ ولایت ته سفر تر سره کړ
د افغانستان اسلامې امارت د عامې روغتیا وزیر، ښاغلي ډاکټر قلندر عباد او ورسره مل پلاوي بلخ ولایت ته د سفر په ترڅ کې د دې ولایت د عامې روغتیا ریاست له مسؤلینو، د روغتیايي خدمتونو د تطبیق کوونکو مؤسسو له استازو او یو شمېر روغتیايي کارکوونکو سره لیدنه ترسره کړه.
د عامې روغتیا وزیر، ښاغلي ډاکټر قلندر عباد په دې لیدنه کې هېوادوالو ته د معیاري روغتیايي خدمتونو د وړاندې کولو په برخه کې د روغتیايي کارکوونکو هڅې او کوښښونه وستایل او و یې هڅول؛ تر څو ولس ته په وخت سره غوره روغتیايي خدمتونه وړاندې کړي.
ښاغلي وزیر زیاته کړه، چې د افغانستان اسلامي امارت د عامې روغتیا وزارت ژمن دی؛ تر څو ټولو هېوادوالو ته معیاري روغتیايي خدمتونه وړاندې کړي، چې په همدې موخه په تېرو دوو کلونو کې د عامې روغتیا وزارت له لوري د هېواد په بېلا بېلو سیمو کې له ۳ سوه زیات روغتیايي مرکزونه جوړ کړي دي او دغه لړۍ به به راتلونکي کې هم دوام ولري.
ښاغلي وزیر همداراز د یاد ولایت د عامې روغتیا ریاست مسئولینو، د روغتیايي خدمتونو د تطبیق کوونکو مؤسسو استازو او روغتیایي کارکوونکو ته د ولس د ښه خدمت په موخه لازمې سپارښتنې ترسره کړې
