د عامې روغتیا وزیر د روغتیا د برخې نړیوالو مسؤلینو سره ولیدل
د افغانستان اسلامي امارت د عامې روغتیا وزیر، ښاغلي مولوي نور جلال جلالي په خپل کاري دفتر کې د افغانستان لپاره د روغتیا نړیوال سازمان له مشر ایډوین سینیزا سلواډور، د نړيوال بانک استازې هادیه سماها، د افغانستان لپاره UNFPA سازمان له مشر کوابینا اسانتي او د روغتیا په برخه کې د یونیسیف ادارې له مسئولینو سره لیدنه ترسره کړه
په دې لیدنه کې په افغانستان کې د روغتیا په برخه کې د شته ستونزو د حل، روغتیايي سیستم د پیاوړتیا او په دې برخه کې د نړیوالو مرستو د جلب اړوند بحث او خبرې ترسره شوې.
د عامې روغتیا وزیر، ښاغلي مولوي نور جلال جلالي د روغتیا وزارت له نړیوالو همکارانو سره په ګډه د ولسونو اړتیاوو ته په کتو د روغتیايي خدماتو پر پیاوړي کولو، په معیاري توګه د ناروغانو ستونزو ته په رسېدنې او شته ستونزو د حل په موخه د دوه اړخېزه هڅو یادونه وکړه او ویې ویل، د هغه ټولو ستونزو د حل لپاره به کار وکړي، چې د روغتیایي سیستم د پراختیا او پیاوړتیا لامل ګرځي.
