د عامې روغتیا وزیر سرپل ولایت کې د یو شمیر مؤسسو له استازو سره وکتل
د افغانستان اسلامې امارت د عامې روغتیا وزیر، ښاغلي ډاکټر قلندر عباد او ورسره مل پلاوي سرپل ولایت ته د سفر په ترڅ کې د روغتیايي خدمتونو د تطبیق کوونکو مؤسسو له استازو او یو شمېر روغتیايي کارکوونکو سره لیدنه ترسره کړه .
د عامې روغتیا وزیر، ښاغلي ډاکټر قلندر عباد په دې لیدنه کې هېوادوالو ته د معیاري روغتیايي خدمتونو د وړاندې کولو په برخه کې د روغتیايي کارکوونکو هڅې او کوښښونه وستایل او و یې هڅول؛ تر څو ولس ته په وخت سره بشپړ روغتیايي خدمتونه وړاندې کړي.
ښاغلي وزیر زیاته کړه، چې د افغانستان اسلامي امارت د عامې روغتیا وزارت ژمن دی؛ تر څو د هېواد ټولو سیمو کې ولسونو ته معیاري روغتیايي خدمتونه وړاندې کړي او په همدې موخه په تېرو دوو کلونو کې د عامې روغتیا وزارت له لوري د هېواد په بېلا بېلو سیمو کې له ۳ سوه زیاته روغتیايي مرکزونه جوړ کړي دي او دغه لړۍ لا هم دوام لري.
ښاغلي وزیر همداراز د یاد ولایت د عامې روغتیا ریاست مسئولینو او د روغتیايي خدمتونو د تطبیق کوونکو مؤسسو استازو ته د ولس د ښه خدمت په موخه لازمې سپارښتنې ترسره کړې.
