د فاریاب روغتیا ریاست د اندخوی په څلورو ولسوالیو کې له عامه او خصوصي روغتیايي مرکزونو پراخ نظارت ترسره کړ
د فاریاب ولایت عامې روغتیا ریاست نظارتي ټيم د څارنې او پلټنې امر ډاکټر عجب خان حمیدي په مشرۍ د اندخوی څلورو ولسوالیو په مرکزونو کې له ټولو دولتي او خصوصي روغتیايي مرکزونو، شخصي کلینیکونو، لابراتوارونو، درملتونونو، د خوړو تولیدي فابریکو، د خوراکي توکو له ګودامونو، پلورنځيو او په آقینې بندر کې د خوراکي توکو د نمونې اخیستنې بهیر څخه نظارت ترسره کړ.
د یاد نظارت پایله کې د یو شمېر خصوصي روغتیايي مرکزونو څانګې، ۱۴ روغتیایي کتنځایونه، ۲ لابراتوارونه او یوه د خوړو د تولید فابریکه د حفظالصحې اصولو نه مراعتولو او قانوني اسنادو نه شتون له امله وتړل شو.
همداراز، ۵۷ قلمه بې کیفیته خوراکي توکي، چې ټول وزن یې ۴ ټنه کېده، راټول او د ټاکل شوي ټیم په شتون کې له منځه یوړل شول.
سربېره پر دې، ۱۲۳ قلمه له نېټې تېر درمل، چې وزن یې یو ټن و، راټول او د له منځه وړلو په موخه د فاریاب ولایت اندخوی ولسوالۍ روغتون ته ولېږدول شول.
د یادونې وړ ده، چې د دغه نظارت پر مهال د اړوندو برخو کارکوونکو ته د خدماتو کیفیت ښه والي په موخه لازمې لارښوونې ترسره او روزنیز معلومات ورکړل شول.
