د مرکز کابل د روغتونونو تشخیصیه څانګو له امرینو سره د ښې همغږۍ په موخه ناسته ترسره شوه
دا ناسته د عامې روغتیا وزارت د معالجوي طب لوی ریاست د تشخیصیه خدمتونو ریاست له لوري د معالجوي طب لوی رئیس ډاکټر وحدت الکوزي، د تشخیصیه خدماتو رئیس ډاکټر محمد قاسم صاحبي او د کابل د روغتونونو تشخیصیه څانګو د آمرینو په ګډون د اندراګاندي ماشومانو درملنې روغتون په تالار کې ترسره شوه.
په دې ناسته کې د معالجوي طب لوی رئیس، ډاکټر وحدت الکوزي د تشخیصیه څانګو د ښه والي، د دغو څانګو د تجهیز، لا زیاتې همغږۍ، د روغتيايي کارکوونکو د ظرفیت لوړولو او د هغوی ستونزو ته د رسېدنې په اړه هر اړخیزې خبرې وکړې او له ګډونوالو یې وغوښتل، چې خپلې ستونزې او ننګونې د معالجوي طب لوی ریاست سره شریکې کړي، څو هغه مثبت بدلونونه چې په پام کې نیول شوي، عملي شي.
همداراز، د عامې روغتيا وزارت د تشخیصیه خدماتو رئیس، ډاکټر محمد قاسم صاحبي وویل: (موږ غواړو د روغتونونو د تشخیصیه څانګو په برخه کې بنسټیز بدلونونه رامنځته کړو، چې په دې برخه کې ستاسو همکارۍ ته اړتیا ده. هغه ټینګار وکړ، چې د راتلونکي کال لپاره د تشخیصیه څانګو اړتیاوې او د خپلو ادارو تدارکاتي پلانونه له دې ریاست سره شریک کړي، تر څو په اړه يې لازم اقدامات ترسره شي.
دغه راز، د تشخیصیه څانګو آمرینو د خپلو ادارو وړاندیزونه، نظرونه او ستونزې د تشخیصیه څانګو د ښه والي په موخه د عامې روغتیا وزارت له مسؤلینو سره شریکې کړې، چې د مسؤلينو له لوري ورته د رسېدنې او حل ډاډ ورکړل شو.
