د معالجوي طب عمومي رئیس د تخصصي او ثالثي روغتونونو له مسؤلینو سره ناسته ترسره کړه
د عامې روغتیا وزارت د معالجوي طب عمومي رئیس، ډاکټر وحدت الکوزي په مرکز کابل کې د تخصصي او ثالثي روغتونونو له مسؤلینو سره ناسته ترسره کړه
په دې ناسته کې په روغتونونو کې د غوره مدیریتي سیستم رامنځته کولو، په خالي بستونو کې د ټرینر متخصصینو ګمارلو، د ګمارنو په برخه کې د کارونو چټکتیا، په بېلا بېلو روغتیايي برخو کې د ټرینرانو روزلو او د غوره روغتیايي خدماتو وړاندې کولو اړوند بحث او خبرې ترسره شوې.
د عامې روغتیا وزارت د معالجوي طب عمومي رئیس په روغتونونو کې د غوره مدیریتي سیستم په رامنځته کولو ټینګار وکړ او د روغتونونو له مسؤلینو یې وغوښتل، چې دې برخې ته لا زیاته پاملرنه وکړي؛ څو ټولو ناروغانو ته پر وخت غوره روغتیايي خدمات وړاندې شي.
بل لور د روغتونونو مسؤلینو د غوره مدیریتي سیستم رامنځته کولو او د چارو د لا ښه والي په برخو کې د بشپړې پاملرنې ډاډ ورکړ او د عامې روغتیا وزارت څخه د ټرینر متخصصینو ګمارلو او په دې برخه کې د اسانتیاوو رامنځته کېدوغوښتونکي شول.
