د هلمند عامې روغتیا ریاست سره د ١٧٦٤٦٠٢ افغانیو په ارزښت د یو شمېر طبي تجهیزاتو مرسته وشوه!
یاده مرسته د فاطمه خیریه بنسټ له لوري وشوه، چې په کې د معلولینو لپاره ۳۰ پایې ویلچرونه، د تنفسي ناروغانو لپاره ۳۰ پایې د اکسیجن کانسنټریټرونه (Oxygen Concentrators)، د انتاني ناروغیو د کنټرول لپاره ۲۰ عدده د الټراوایلټ وړانګو فلټرونه او د درملو دقیقه تطبیق لپاره ۲۰ عدده انفیوژن پمپونه او ۲۰ عدده سرنج پمپونه شامل دي.
د هلمند د عامې روغتیا رئیس، مولوي فضلي احمد شفیع الله د یادې مرستې له امله د فاطمه خیریه بنسټ له مسؤلینو څخه مننه وکړه او ویې ویل، چې دغه تجهیزات به په روغتونونو او روغتیایي مرکزونو کې ګڼې اسانتیاوې رامنځته او د خدماتو کیفیت لوړ کړي.
