د هلمند ولایت عامې روغتیا ریاست اړوند د روږدو درملنې سل بستریز روغتون کې د ۴۲ تنه تداوي شویو روږدو د حرفوي زده کړو فراغت مراسم ترسره شول
یاد کسان د درې میاشتو لپاره د حرفوي زده کړو پروګرام کې شامل شوي وو او اوس یې د زده کړو بهیر په بریالیتوب سره پای ته رسېدلی دی، چې له ډلې یې ۲۲ تنه د موټرسایکل ترمیم برخه کې او ۲۰ تنه د سولري سیستمونو د نصب او ترمیم په برخه کې له زده کړو فارغ شول.
د یادونې وړ ده، چې هر فارغ ته د فراغت رسمي سند سربېره د خپل مسلک اړوند کاري کیټونه هم ورکړل شول؛ څو وکولای شي په راتلونکي کې له خپلو مهارتونو څخه په روزمره ژوند کې ګټه واخلي.
هېره دې نه وي، چې تر دې وړاندې هم ۱۷۸ تنه له حرفوي زده کړو څخه فارغ شوي وو.
