د پکتیا ولایت سیمه ییز روغتون کې په لمړي ځل د اکمال تخصص پروګرام پیل شو!
د عامې روغتیا وزیر ښاغلي مولوي نورجلال جلالي پکتیا ولایت ته د خپل کاري سفر پر مهال د دې ولایت په سیمه ییز روغتون کې په لمړي ځل د اکمال تخصص پروګرام پرانسته وکړه ، یاد روزنیز پروګرام چې په لمړي سر کې به د پنځو څانګو (عمومي جراحي، عمومي داخله ، د ماشومانو عمومي داخله ، نسايي ولادي او ارتوپيډي) درلودونکی وي د ځوانو ډاکټرانو د روزنې او د زون په کچه د متخصصینو د شتون اړوند به خورا مؤثر ثابت شي.
د عامې روغتیا وزیر د یاد پروګرام د پرانستې پر مهال د روغتیایي کارکوونکو د ظرفیت لوړونې برنامو ته په اشارې سره وویل ، هڅه مو دا ده چې د اکمال تخصص برنامه لا پراخه او معیاري کړو ، چې په مرسته به یې د هیواد روغتیایي سیستم لا پیاوړی او شته ستونزې به تر ډیره حل شي ، نوموړي همدارنګه د پکتیا ولایت سیمه ییز روغتون لپاره د سي ټي سکین خدماتو اړوند هم یادونه وکړه چې په نږدې کې به یې تدارکاتي چارې تر سره شي.
د یادې پرانستې پر مهال د عامې روغتیا وزارت د اکمال تخصص لوی رئیس ډاکټر نثار احمد نیازي په پکتیا ولایت کې د اکمال تخصص برنامې پیل د رهبرۍ هڅې ، او د ملت لپاره د ښې ارادې او تعهد څرګندونه وګڼله ، او د خپلې وینا پر مهال یې یادونه وکړه چې ډېر ژر به یاد پروګرام ته ځوانان معرفي او د اړوند اړینو بستونو لپاره به هم ازموینه واخیستل شي.
