د کابل ښار په بېلا بېلو برخو کې د کانګو ناروغۍ په اړه د عامه پوهاوي لوړولو په موخه زرګونه پوسټرونه وویشل شول
د عامې روغتیا وزارت د چاپیریال روغتیا ریاست له لوري د کابل ښار په بېلا بېلو برخو (شکردرې ولسوالۍ، د څارویو د خرڅلاو ځایونو، دوکاندارانو، قصاب خونو او نورو عامه ځایونو) کې د کانګو ناروغۍ د مخنیوي په اړه د عامه پوهاوي پوسټرونه نصب او وویشل.
د دغو پوسټرونو د وېشلو موخه د کانګو ناروغۍ او د هغې د مخنیوي لارو چارو په اړه د خلکو عامه پوهاوی لوړول دي، ترڅو د عامه پوهاوي پواسطه په خلکو کې د دې خطرناکې ناروغۍ د خپرېدو مخه ونیول شي.
یادو پوسټرونو کې د کانګو ناروغۍ اړوند د نښو نښانو، د انتقالېدو، د مخنیوي میتودونو او د روغتیايي لارښوونو د تعقیبولو اړین او مهم معلومات شامل دي، په ځانګړې توګه کله چې څاروي ذبح کېږي.
د ښار په ګڼه ګوڼه او عامه ځایونو کې د یادو پوسټرونو په نصبولو سره، خلک هڅول کېږي، چې د کانګو ناروغۍ په اړه اړین اقدامات وکړي او د خپل ځان او نورو د روغتیا ساتنه وکړي.
