د کندز ولایت د قلعه ذال ولسوالۍ عمومي روغتون د جوړولو افر پرانیستې پروسه ترسره شوه
دغه پروسه د عامې روغتیا وزارت د اړوندو ریاستونو (تدارکاتو، تاسیساتو او ساختماني چارو، مالي او حسابي، عدلي طب) او ۱۵ ودانیزو شرکتونو د استازو په شتون کې ترسره شوه.
د عامې روغتیا وزارت د افر پرانیستې پروسې مسؤلینو وویل: (دغه پروسه په بشپړه توګه شفافه ده او له هغه شرکت څخه چې بریالی کېږي، تمه لرو کارونه په ټاکلي وخت د عامې روغتیا وزارت له شرطونو سره سم ترسره کړي؛ ځکه چې دا د عامه ګټو پروژه ده او موږ به یې له چارو څخه څارنه هم کوو).
بل لور، د ودانیزو شرکتونو استازو ژمنه وکړه، که په دې پروسه کې بریالي شي، د عامې روغتیا وزارت له معیارونو سره سم به د روغتون د جوړېدو چارې ترسره کوي.
د یادونې وړ ده، د عامې روغتیا وزارت د هېواد په ۳۱۸ ولسوالیو کې د عمومي روغتونو د جوړولو پلان لري، چې د یادې پروسې تدارکاتي چارې دوام لري.
