عامې روغتیا وزارت او همکارې ادارې د زلزلې قربانیانو لپاره ګډه کمېټه جوړوي
عامې روغتیا وزارت په کونړ کې د زلزلې له امله زیانمنو شویو هېوادوالو ته د روغتیايي خدمتونو او نورو اړینو اسانتیاوو د غوره مدیریت، سمون او تنظیم په موخه د خاص کونړ ولسوالۍ په نظامي قرارګاه کې د سرې میاشتې ټولنې، د ولایت مقام او اړوندو مرستندویه مؤسسو په همکارۍ یوه ګډه د همغږۍ کمېټه جوړه کړه
یاده ګډه کمېټه به په دغه قرارګاه کې د خوراکي توکو د مرستو د منظم جلب او عادلانه وېش تر څنګ د یو ګرځنده روغتیايي مرکز او یو کمپ په جوړولو کار وکړي، چې د دې مرکز او کمپ له لارې به نه یوازې د زلزله ځپلو خلکو لپاره د لومړنیو او بېړنیو روغتیايي خدمتونو زمینه برابره شي، تر څنګ به یې د هستوګنې لپاره خوندي ځای هم ځانګړی شي.
د دې کمېټې د جوړېدو موخه د زلزلې له امله زیانمن شویو کورنیو ته په وخت، منظم او اغېزمن ډول روغتیايي اسانتیاوې، خوراکي توکي او د سرپناه امکانات برابرول دي، تر څو د هغوی ستونزې په بېړني ډول راکمې او د ژوند شرایط یې ښه شي.
