لومړي ځل لپاره د هیواد په دولتي روغتیایي سکتور کې د ماشومانو د زړه د جراحۍ او هیموډیالیز څانګې پرانیستل شوې
په همدې موخه جوړو شویو مراسمو کې د ا.ا.ا د عامې روغتیا وزیر، ښاغلي مولوي نور جلال جلالي، د بهرنیو چارو وزیر ښاغلي مولوي امیر خان متقي، د عامې روغتیا وزارت د روغتیایي خدمتونو وړاندې کولو مرستیال ښاغلي مولوي عبدالولي حقاني، د وزارت مرکزي رئیسانو، د مرکزي روغتونونو رئیسانو، اندراګاندي د ماشومانو درملنې روغتون روغتیایي کارکوونکو، د روغتیا نړیوال سازمان، یونیسف، ایمرجنسي بنسټ، سره صلیب، افغاني سرې میاشتې او رسنیو استازو ګډون کړی و.
د عامې روغتیا وزیر، په دې مراسمو کې وویل: ( د خوښۍ او ویاړ ځای دی، چې د افغانستان په دولتي سکتور کې د لومړي ځل لپاره د ماشومانو د زړه جراحي خلاص عملیاتونو او د هیموډیالیز څانګې په اندراګاندي د ماشومانو درملنې روغتون کې پرانیستل شوې، زه دا اقدام د فوق تخصصي خدمتونو وړاندې کولو په لور یو لوی او تاریخي ګام ګڼم او زموږ د هېواد روغتیایي ټیم توانېدلی چې تر دې دمه په دې څانګه کې د زړه جراحي درې عملیاتونه په بریالیتوب سره ترسره کړي).
د عامې روغتیا وزیر همداراز زیاته کړه، د عامې روغتیا وزارت د خپلې ستراتیژۍ پر بنسټ د نویو سیسټمونو په جوړولو، د مسلکي کارکوونکو په روزنه او په پرمختللو تجهیزاتو سره د روغتونونو په سمبالولو کار کړی دی او نن ورځ یې د ماشومانو د زړه ناروغیو د درملنې برخه کې د پام وړ لاسته راوړنې ترلاسه کړې دي.
