ننګرهار ولایت کې د یو پرمختللي ریفرینس لابراتوار د جوړېدو د بنسټ ډبره کېښودل شوه
د عامې روغتیا وزارت له لوري په ننګرهار ولایت کې د ۲۱ میلیونه افغانیو په ارزښت د یو پرمختللي ریفرینس لابراتوار د جوړېدو د بنسټ ډبره کېښودل شوه
په همدې موخه جوړو شویو مراسمو کې د عامې روغتیا وزارت د روغتیايي خدمتونو وړاندې کولو مرستیال، ښاغلي مولوي عبدالولي حقاني، د ننګرهار د عامې روغتیا رئیس مولوي امین الله شریف، د روغتیا نړیوال سازمان او د روغتیا په برخه کې د تطبیق کوونکو مؤسسو استازو، د ننګرهار د والي مرستیال مولوي سعید احمد بنوري او د دغه ولایت د یو شمېر نورو ادارو مسؤلینو شتون درلود.
د عامې روغتیا وزارت د روغتیايي خدمتونو وړاندې کولو مرستیال، ښاغلي مولوي عبدالولي حقاني د یاد لابراتوار جوړېدل د ختیځ زون په ځانګړي توګه د ننګرهار ولایت اوسېدونکو ته د روغتیا په برخه کې یوه ستره لاسته راوړنه یاده کړه او ویې ویل: ( د هېواد په کچه دا شپږم ستر لابراتوار دی چې جوړیږي او د ۲۴ څانګو لرلو سربېره به په ټولو اړینو لابراتواري تجهیزاتو سمبال او په بېلا بېلو تشخیصیه برخو کې به ناروغانو ته خدمات ترسره کوي.)
د روغتیايي خدمتونو وړاندې کولو مرستیال همداراز زیاته کړه، د یاد مرکز د جوړېدو اساسې موخه د ننګرهار، کونړ، لغمان او نورستان ولایتونو د ناروغانو پر وخت تشخیص، د روغتیایي سکتور ظرفیت لوړول او د بېلا بېلو ناروغیو د تشخیص په برخه کې په بهرنیو هېوادونو د هېواد د وګړو تکیه را کمول دي.
د یادونې وړ ده، چې دغه مرکز د عامې روغتیا وزارت د تشخیصیه خدماتو او د مرستو د همغږۍ او روغتیایي چارو د پیاوړتیا ریاستونو له لوري د ګلوبل فنډ په مالي لګښت د UNDP ادارې په تخنیکي همکارۍ جوړیږي، چې د روان زېږدیز کال تر پایه به یې د جوړېدو چارې بشپړې او ګټې اخیستنې ته به وسپارل شي.
