په عامې روغتیا وزارت کې د IHR-2005 پر بنسټ پنځهورځنی ګډ بهرنۍ ارزونې ورکشاپ پیل شو
د عامې روغتیا وزارت د روغتیايي خدمتونو وړاندې کولو مرستیال، ښاغلي مولوي عبدالولي حقاني په مشرۍ د څارنې او پلټنې لوی ریاست له لوري د نړیوالو روغتیایي مقرراتو (IHR-2005) پر بنسټ د پنځهورځنۍ ګډې بهرنۍ ارزونې ورکشاپ پیل شو
په دغه ورکشاپ کې د روغتیايي خدمتونو وړاندې کولو مرستیال، د وزارت مرکزي رئیسانو، د بېلابېلو وزارتونو او روغتیا نړیوال سازمان (WHO) استازو ګډون کړی و.
د روغتیايي خدمتونو وړاندې کولو مرستیال، ښاغلي مولوي عبدالولي حقاني دا ورکشاپ د عامې روغتیا وزارت لپاره یوه ارزښتمن فرصت وباله، تر څو له دې لارې ارزونې، لاسته راوړنې، ستونزې او نیمګړتیاوې په واضح ډول وڅېړل شي او د راتلونکي لپاره یو روښانه پلان جوړ شي.
ښاغلي مرستیال زیاته کړه، دا بهیر د ناروغیو خپرېدو د مخنیوي، ګړندي غبرګون او د نړیوالو معیارونو پر بنسټ د روغتیايي خوندیتوب د ټینګښت په برخه کې مرسته کوي. هغه هیله وښوده چې د دغې ارزونې پایلې به د راتلونکو کلونو د پراختیايي نقشو د جوړولو زمینه برابره کړي او زموږ ستراتیژیک پلانونه به لا پیاوړي کړي.
بل لور ته د روغتیا نړیوال سازمان استازي، ډاکتر جمشید تنولي وویل، د دې ارزونې بشپړول د هېواد د روغتیايي ظرفیتونو، اړتیاوو او لومړیتوبونو د ګډ تشخیص په لوري یو مهم ګام دی، هغه دا پروسه د ارزونې تر څنګ د همکارۍ او پرمختګ یو ګډ بهیر وباله، چې موخه یې د IHR-2005 مقرراتو پلي کول او د ملي روغتیايي ظرفیتونو پیاوړتیا ده، نوموړي ډاډ ورکړ ، چې د روغتیا نړیوال سازمان به په دې برخه کې خپلې تخنیکي همکارۍ ته دوام ورکوي.
دغه راز، د عامې روغتیا وزارت د څارنې او پلټنې لوی رئیس، ډاکتر عنایتالله عنایت د یو پریزنټېشن په ترڅ کې ګډونوالو ته د تېرو کلونو د ګډو بهرنيو ارزونو او لاسته راوړنو اړوند هر اړخیز معلومات ورکړل.
