په ټول هیواد کې د پولیو واکسین دوهم پړاو کمپاین په روان زیږدیز کال کې پیل شو
کابل، ۱۹/۷/۱۴۴۳/ هـ . ق ۲/۱۲/۱۴۰۰ هـ. ش
د افغانستان د اسلامي امارت د عامې روغتیا وزارت د یونیسف او د روغتیا نړیوال سازمان په همکارۍ نن په ټول هیواد کې د پولیو ضد واکسین کمپاین پیل کړ. دا په روان کال کې د پولیو د واکسین دوهم پړاو سرتاسري کمپاین دی، چې موخه یې ۹،۱ میلیونه هغه ماشومان چې عمرونه یې له پنځو کلونو کم دي، د پولیو پر وړاندې واکسین شي.
په دې کمپاین کې بامیان، دایکندي او غور ولایتونه او د غزني او بدخشان ولایتونو یو شمیر ولسوالۍ د سړې هوا له امله نه دي شاملې. همداراز دغه کمپاین به په دوو پړاوونو کې پلی کیږي، چې دویم پړاو یې په سویلي او ختیځه حوزو کې د کب یا حوت میاشتې په ۹مه نیټه پیل شي.
د افغانستان د اسلامي امارت د عامې روغتیا وزیر ډاکټر قلندر عباد په هیواد کې اوسنې وضعیت د پولیو د واکسین د کمپاینونو او نورو روغتیايي خدمتونو د ښه تطبیق او وړاندې کولو لپاره مساعد وباله او له ټولو روغتیايي کارکوونکو او هغو کسانو څخه چې د پولیو واکسیناسیون په برخه کې کار کوي غوښتنه وکړه چې د دې ناروغۍ د له منځه وړلو لپاره پوره هڅې وکړي او د پنځو کلونو څخه کم عمره ماشومانو ته د پولیو واکسین کمپاین په ښه توګه تطبیق کړي.
افغانستان د پخوا په پرتله د پولیو له منځه وړلو ته ډير نږدې شوی او ټول هیوادوال باید په ګډه کار وکړي ترڅو د پولیو واکسین کمپاین په بریالیتوب سره پلي شي.
پوليو يوه ويروسي ناروغي ده چې د درملنې وړ نه ده او يوازې د واکسين په مټ يې مخه نيول کيداى شي. هغه ماشومان چې په دې ناروغۍ اخته کیږي د تل لپاره فلج یا مړه کیږي.
په روان زیږدیز کال تر اوسه په پکتیکا ولایت کې د پولیو یوه مثبته پېښه ثبت شوې او د دغه ویروس جنیټیکي ریښه د پاکستان کویټې له مثبتو پېښو سره تړاو لري.
