ډاکټر سلیمان دولت زی د طبي شورا لوی ریاست اړوند د روغتیايي کارکوونکو د تنظیم رئیس په توګه وټاکل شو
د عامې روغتیا وزارت د طبي شورا لوی ریاست اړوند د نرسانو، قابلو او نورو روغتیايي کارکوونکو د تنظیم رئیس ډاکټر سلیمان دولت زي د معرفي کېدو مراسمو کې د یاد وزارت د مقام دفتر لوی رئیس شیخ محمد طاهر حلیم او د طبي شورا لوی رئیس ډاکټر فقیر محمد زیار شتون درلود.
د عامې روغتیا وزارت د مقام دفتر لوی رئیس، شیخ محمد طاهر حلیم د نرسانو، قابلو او روغتیايي پرسونل د مهم رول پر اهمیت او د دې برخې پر لا زیات ملاتړ ټینګار وکړ. همدارنګه، د طبي شورا لوی رئیس ډاکټر فقیر محمد زیار، ډاکټر سلیمان دولت زي ته په نوې دنده کې د بریالیتوب هیله څرګنده کړه.
ورته مهال ډاکټر سلیمان دولت زی ژمنه وکړه، چې د چارو د لا ښه تنظیم او روغتیايي خدمتونو د کیفیت لوړولو لپاره به له هېڅ ډول هڅو ډډه ونه کړي.
