د عامې روغتیا وزارت پلاوي او يونيسف ادارې استازو په لغمان ولایت کې له یو شمېر روغتونونو او روغتيايي مرکزونو څخه هر اړخیز نظارتونه ترسره کړل
دغه نظارتونه چې د عامې روغتيا وزارت ټاکل شوي پلاوي او لغمان عامې روغتيا رياست يو شمېر مسؤلینو له لوري ترسره شول، په ترڅ کې يې د وړاندې کېدونکو روغتيايي خدمتونو بهیر، د واکسیناسیون خدمات، د روغتیايي کارکوونکو کړنې، د خدمتونو کیفیت، د موجودو امکاناتو وضعیت، د مور او ماشوم روغتيايي خدمات، تغذيې او عاجل خدمتونه، لابراتوارونه، درملتونونه او د ثبت او راپور ورکوونې سيستمونه وارزول شول.
د يادو نظارتونو موخه د روغتیایي خدمتونو کیفیت لوړول، هېوادوالو ته د معیاري او پر وخت روغتیايي خدمتونو وړاندې کول او په روغتیايي سکتور کې د شفافیت پیاوړتیا ده؛ څو شته ستونزې حل، د روغتيايي خدمتونو کیفیت لوړ، د خلکو لازمه درملنه ترسره او روغتيايي اړتياوې يې پوره شي.
د ترسره شويو نظارتونو پر مهال د روغتیايي مرکزونو مسئولینو او کارکوونکو خپلې ستونزې، اړتیاوې او وړاندیزونه له ذکر شوي پلاوي سره شریک کړل او د مسئولینو له لوري ورته د ستونزو حل او همکارۍ ډاډ ورکړل شو.
