د عبدالرحمن بن عوف رضي الله عنه مدرسې زده کوونکو ته د نشه يي توکو مخنیوي او عامه پوهاوي پروګرام ترسره شو
یاد پروګرام د عامې روغتیا وزارت د روږدو درملنې ملي برنامې رياست اړوند، ابن سينا د روږدو درملنې ۱۰۰۰ بستریز روغتون د نشه يي توکو درملنې او پوهاوي مسؤلینو له لوري تنظیم شوی و، چې په کې د نشه يي توکو پر وړاندې د پوهاوي پر اهمیت، د سالم راتلونکي په جوړولو کې د ځوانانو پر رول، د روږدیتوب د مخنیوي پر ارزښت، د روږدیتوب لاملونو، د نشه یي توکو مخنیوي برخه کې د کورنیو او ملګرو رول، د ټولنیز لید له مخې د خطرونو پر وړاندې د مبارزې لارو چارو او پر ټولنې باندې د روږدیتوب د منفي او ناوړه اغېزو په اړه ګډونوالو ته معلومات وړاندې شول.
همدارنګه، د یادې مدرسې مسؤلینو او استادانو د دغه ډول پروګرامونو له جوړېدو څخه هرکلی وکړ او دا ډول پروګرامونه یې د نشه يي توکو مخنیوي برخه کې اغېزمن وبلل.
