عامې روغتیا وزارت د روغتیايي ظرفیت لوړونې او مسلکي زده کړو لپاره له AKF سره تړون لاسلیک کړ

د عامې روغتیا وزارت له لوري په پروان، سمنګان، دايکندي او کندز ولایتونو کې د تخنيکي او حرفوي زده کړو له لارې د کورنيو پياوړتيا، د ښځينه روغتيايي کارکوونکو لپاره د عملي زده کړو يا Internship او د ټولنيزو روغتيايي کارکوونکو د ظرفيت لوړونې په موخه له Agha Khan Foundation-AKF مؤسسې سره د (۲۳۲۸۳۱۹) دوه میلیونه درې سوه اته ویشت زره درې سوه نولس کاناډایي ډالرو په ارزښت تړون لاسليک شو

دا تړون د روغتيايي خدمتونو کيفيت لوړولو، لاسرسي زياتولو او د ولس روغتيايي ستونزو کمولو په موخه د څلورو کلونو لپاره لاسليک شو، چې له مخې به یې د ۱۰ روغتونونو له لارې د یادو ولایتونو (۲۱۴۹) تنه اوسېدونکي د تخنيکي او حرفوي زده کړو په مرسته د کورنيو پياوړتيا، د ښځينه روغتيايي کارکوونکو لپاره د عملي زده کړو يا Internship او د ټولنيزو روغتيايي کارکوونکو د ظرفيت لوړونې برخمن او (۲۷) تنو ته به روغتیايي برخه کې د کار زمینه برابره شي.

بل لور، د AKF مؤسسې استازو هم ډاډ څرګند کړ، چې ياده پروژه به د څلورو کلونو په ترڅ کې له ټولو ټاکل شويو معيارونو سره سمه پلي کړي او د خلکو روغتيايي اړتیاوو پوره کولو ته به ځانګړې پاملرنه کوي.