د عامې روغتيا وزارت له لوري د مور په شيدو د تغذيې په اړه د عامه پوهاوي غونډه ترسره شوه
په دې غونډه کې چې د عامې روغتيا وزارت د روغتيايي خدمتونو وړاندې کولو مرستیال، ښاغلي مولوي عبدالولي حقاني، يو شمېر مرکزي رئیسانو، د نړيوالو همکارو ادارو او رسنيو استازو ګډون کړی و، د روغتيايي خدمتونو وړاندې کولو مرستیال وويل: د مور په شيدو تغذيه د سالمې ټولنې بنسټ جوړوي او زياته يې کړه، د مور شيدې د يوه مهم او پياوړي واکسين په توګه د ساري ناروغيو، نس ناستي او خوارځواکۍ مخنیوي او معافيتي سيستم پياوړتيا برخه کې بنسټيز رول لري.
همدارنګه، ښاغلي مرستیال وویل: عامې روغتيا وزارت د ساري ناروغيو مخنيوي او عامه تغذيې پروګرامونو پراختيا او پياوړتيا لپاره هڅې چټکې کړي؛ څو د هېوادوالو روغتيا خوندي او د ناروغیو مخه ونيول شي.
دغه راز، د ناروغيو د کنټرول او مخنيوي لوی رئیس ډاکټر حيدر خان حيدر د ياد رياست د فعاليتونو په اړه معلومات وړاندې، د وقايوي تدابيرو پر پياوړتيا يې ټينګار ترسره او د مور په شيدو تغذيه یې د مور او ماشوم د روغتيا خونديتوب لپاره مهم وبلله.
ورته مهال، د عامه تغذيې رئیس ډاکټر حکمت الله معصومي هم وويل: د مور شيدې يوازې غذا نه ده، بلکې د مور او ماشوم په روغتيا خونديتوب او د ټولنې په اقتصادي پرمختګ او هوساينه کې بنسټيز رول لري.
د غونډې په پای کې د عامې روغتيا وزارت وياند ډاکټر شرافت زمان د عامه تغذيې په اړه د ياد وزارت اعلاميه وړاندې کړه.
