د افغانستان ا.ا د عامې روغتیا وزیر د اسلامي همکاریو سازمان له مرستیال او مل پلاوي سره ليدنه وکړه
د عامې روغتیا وزیر، ښاغلي مولوي نورجلال جلالي په خپل کاري دفتر کې د اسلامي همکاریو سازمان (OIC) د سرمنشي له مرستیال، ښاغلي سفیر طارق علي بخیت او مل پلاوي سره ليدنه ترسره کړه.
په دې لیدنه کې د افغانستان له روغتیايي سيستم سره د دوامدارې همکارۍ، د ساري ناروغیو مخنیوي او په راتلونکي کې د روغتیا په برخه کې د اسلامي هېوادونو ترمنځ د همغږۍ او همکاریو پیاوړتیا په اړه بحث او خبرې وشوې.
د عامې روغتیا وزیر، ښاغلي مولوي نورجلال جلالي په هېواد کې د ولسوالیو په کچه روغتونونو ته د اړینو تجهیزاتو برابرولو، د روغتیايي کارکوونکو د ظرفیت لوړونې پروګرامونو او په روغتیا برخه کې د اسلامي هېوادونو له حکومتونو سره د هوکړهلیکونو لپاره د زمینې برابرولو په اړه خپلې غوښتنې او وړاندیزونه د اسلامي همکاریو سازمان له پلاوي سره شریک کړل.
دغه راز، ښاغلي وزیر د سرطاني ناروغیو د درملنې روغتون او قلبي څانګې لپاره د اړینو تجهیزاتو برابرولو، د سوري زړه په ناروغۍ د اخته ماشومانو د عملياتونو او په دې برخه کې د مالي ملاتړ په اړه هم د یاد سازمان له پلاوي سره خبرې وکړې.
د اسلامي همکاریو سازمان پلاوي په یادو برخو کې د دوامدارې همکارۍ ډاډ ورکړ او ويې ويل، هڅه یې ده چې په ذکر شویو برخو کې هر اړخیزې همکارۍ او همغږۍ ته کار وکړي ، ښاغلي بخیت همدارنګه وویل په راتلونکي کې به د یو شمېر قلبي ستونزې لرونکو ماشومانو د عملياتونو مالي لګښتونه هم پر غاړه واخلي.
