فراه ولایت کې له یو شمېر درملتونونو او د خوراکي توکو پلورنځیو څخه د څارنې په پایله کې ۷۵ کیلوګرامه له نېټې تېر توکي راټول شوي دي
د فراه عامې روغتیا ریاست د څارنې او پلټنې آمریت مسؤلینو په تېره یوه اوونۍ کې د یاد ولایت د خوراکي توکو له یو شمېر پلورنځیو، تولیدي شرکتونو او درملتونونو څخه نظارت ترسره کړی، چې په پایله کې یې ۷۵ کیلوګرامه له نېټې تېر خوراکي توکي او درمل راټول شوي او د له منځه وړلو په موخه ټاکل شوي ځای ته لېږدول شوي دي.
همدارنګه، د یاد آمریت مسؤلینو یو درملتون د روغتیايي قوانینو د سرغړونې له امله تړلی او مسؤلینو ته یې لارښوونه کړې چې خپل فعالیتونه د ټاکل شویو روغتیايي اصولو او قوانینو له مخې تنظیم کړي.
د عامې روغتیا ریاست مسؤلینو ټینګار کړی چې د روغتیايي قوانینو د نه مراعاتولو په صورت کې به له سرغړوونکو سره قانوني چلند ترسره کېږي.
