د عامې روغتیا وزارت د وینې ملي بانک له لوري په بهرنیو چارو وزارت کې د خوندي وینې راټولولو او عامه پوهاوي یو ورځنی کمپاین ترسره شو
په دغه کمپاین کې د بهرنیو چارو وزارت ۳۴ تنو مسؤلينو او کارکوونکو د وینې ورکولو په بهیر کې فعاله ونډه واخیسته او د اړمنو ناروغانو د ژغورنې په موخه یې ټولټال ۱۷ زره سي سي وینه د وینې ملي بانک ته ورکړه.
یاده وینه د وینې ملي بانک د کارکوونکو له لوري بانک ته ولېږدول شوه، چې له اړینو لابراتواري معایناتو او خوندیتوب له ارزونې وروسته به اړمنو ناروغانو ته ووېشل شي.
د يادونې وړ ده، چې د وینې ملي بانک هڅه کوي، د وینې ورکولو کمپاینونو او عامه پوهاوي پروګرامونو له لارې د وینې زېرمه پیاوړې کړي، د وینې د کمښت مخه ونیسي او د اړمنو ناروغانو اړتیاوو ته پر وخت او خوندي ډول رسېدنه وکړي.
