د کندهار ولایت تخته پُل ولسوالۍ اړوند په نشه يي توکو د روږدو کسانو د درملنې په مرکز کې ۱۰۰ بستریز روغتون پرانیستل شو
د عامې روغتیا وزارت د نشه یي توکو پر وړاندې د مبارزې مسئول، ډاکټر نورالامین زرمل یادو مراسمو ته په وینا کې وویل، د عالیقدر امیرالمؤمنین شیخ صاحب حفظه الله د حکم پر اساس د هېواد په شپږو زونونو کې د روږدو کسانو د درملنې مرکزونه جوړ شوي، چې په یادو مرکزونو کې د عامې روغتیا وزارت له لوري سل بستریزه روغتونونه منظور شوي دي چې په لړ کې یې دا دی د کندهار تخته پُل ولسوالۍ د روږدو د درملنې سل بستریز روغتون پرانیستل شو.
د کندهار ولایت د روږدو د درملنې سل بستریز روغتون په مجهزو وسایلو سمبال دی چې د عامې روغتیا وزارت په ځانګړې لارښوونه ۱۲ تنه با تجربه ډاکټران د کابل ابن سینا زر بستریز روغتون څخه دې روغتون ته لېږل شوي؛ څو د روږدو کسانو درملنه ترسره کړي.
د یادنې وړ ده، چي د کندهار تخته پُل ولسوالۍ اړوند په نشه يي توکو د روږدو کسانو د درملنې مرکز کې د نېږدې درې زره روږدو کسانو درملنه روانه ده، چي دغه ناروغان د کندهار او نیمروز ولایتونو تر څنګ د یو شمېر نورو ولایتونو څخه هم دې مرکز ته انتقال شوي دي.
